Joan den astean sarea astindu zuen mugimendua izan zen #EzEbidentziarikGabe eta guk ere honekin bat egin nahi dugu.
#EzEbidentziarikGabe
Ebidentzia medikuntza modernoaren zutabeetako bat da. Ez da beti horrela izan: urtetan, aurretik eraginkortasuna eta segurtasuna ziurtatu gabe eman izan dira tratamenduak. Batzuk eraginkorrak izan ziren arren, beste askok ondorio kaltegarriak eragin zituzten.Alabaina, gizakiaren historian ezaguera zientifiko gehien metatu den garaian, badira, oraindik, inolako eraginkortasunik eta segurtasunik frogatu gabe diziplina mediko gisa jardun eta pazienteengana hurbildu nahi duten sasizientzia ugari.
Adierazpen honen sinatzaileok, guztiak osasungintzako edo zientziatako beste arloetako profesionalak, kazetariak eta bestelakoak garenok, badakigu gure ardura legal eta etikoa dela pazienteei tratamendurik onena eskaintzea, eta haien osasuna zaintzea. Horregatik, osasun-langile, zientzialari eta herritar gisa, kezkatu egiten gaitu komunikabideetan agertutako berriak, esanez sendagai homeopatikoak arautzeko eta onartzeko prozesu bat ireki dela, eta iruditzen zaigu zerbait egin behar dugula horren aurrean.
Espainiako Medikamentuen eta Osasun Produktuen Agentziako (AEMPS) zuzendariaren adierazpenek, ziurtatuz “botika homeopatiko guztiek ez dutela zertan frogatu eraginkortasuna” eta “segurtasuna ez dela frogatu behar berariazko entsegu klinikoen bidez”, gure kezka areagotu besterik ez dute egiten.
Honengatik guztiagatik, hau eskatzen dugu:
- Entsegu kliniko bidez gutxienez plazeboak baino eraginkortasun- eta segurtasun-maila handiagoak frogatu ez dituen tratamendurik ez onartzea. Indikazio teraupeutikorik gabeko ustezko sendagai homeopatikoak arautzea kontraesan hutsa da, eta arbuiatu egin behar da. Indikaziorik ez badu, zertarako eman?
- AEMPSek merkatutik ken ditzala, lehenago onartuak izan diren arren, plazeboa baino eraginkorragoak direla frogatu ez duten edota neurriz kanpoko ondorio kaltegarriak dituzten mota guztietako sendagaiak.
- Osasun, Gizarte Zerbitzu eta Berdintasun Ministerioak, eta osasungintzaren alorreko gainerako agintariek, jazar ditzatela bere produktuek sendatzeko gaitasuna edo osasunerako onurak dituztela zientifikoki frogatu gabe aldarrikatzen duten ekoizleak.
- Espainiako Mediku Elkargoen Kontseilu Orokorrak / Mediku Elkargoen Erakundeak, Kode Deontologikoaren 26. artikuluan oinarrituz, gaitzets dezala ebidentzia zientifikorik gabeko tratamenduak agintzen dituzten medikuen jarduna.
Bide batez eta gaiarekin lotuta, elhuyar aldizkarian azaldutako elkarrizketa interesgarri baten lotura uzten dizuegu.
Entradas
